apophates' Journal

Православное почитание святых против просвещенческих мифов
К этому вот.

Память преподобного отца нашего Мефодия епископа Моравского, учителя
Русскаго.

Преподобный отец наш Мефодий бе от града Селунскаго, от сановитых и богатых
родителей рожден, от отца Льва, матери же Марии. Бе же от юности юноша мудр
зело, беседою книжною и крепок телом. Знаем бе и Царем: имеяше бо его Царь
всегда пред собою. Егда же бысть лет дванадесяти, постави его князя
славяном, и пребысть там десять лет, и извыче славенску языку, и словеса
азбучная сложиста с братом свои Кириллом. И помысли в себе скороминующее
житие века сего и долгое грешных мучение, умилися страхом Божиим, и положи
сан княжеский пред Царем, и шед на Олимбскую гору, и бысть черноризец.

Некогда же Царь посла брата его Кирилла в козары, да препрет жиды и изженет
от земли их. Бяху бо козари уже прияли жидовскую веру. Кирилл же умоли брата
своего Мефодия идти с собою, яко умеяше язык словенский. Обыдоша же страну
ту всю, и вся люди укрепиша и увериша, а жиды прогнаша. И просяху славяне
крещения, а козари учителя, а моравляне епископа, а волоси наставника.
Возврати же ся Мефодий в Константинь град, патриарх же освятив его епископа и
посла в Моравы, и тамо многа чудеса сотвори, Замврия же некоего родом
козарина, а верою еретика, противящеся ему, и хуляща веру Христову, обличи.
И повеле князь Моравский быти собору. И собрася жидов со Замврием две тысящи
мужей. Мефодий же един прииде. Они же хуляху Христову веру. Мефодий же яко
изящный борец пророческими словесы и апостольскими реченьми яко воин на обе
руце стреляя на жиды и на еретики, и препре их. И ту сотворися чудо великое:
Замврий разсядеся, а Седислава пожре земля. А на прочих возгореся огнь, и
тако разбегошася. Христиане же рады быша, и нарекоша Мефодия Христовы уста.
Пожив же, и в старости добре преставися к Богу.

Пролог. Москва, 1689. Аналогично все дониконовские и послениконовские
издания Пролога XVII в.