tartaristão celestial's Journal
 
[Most Recent Entries] [Calendar View] [Friends View]

Friday, April 26th, 2013

    Time Event
    12:03a
    КНИГА ГЛАГОЛЕМАЯ ЛѣТОПИСЕЦ,ПИСАНА В ЛѣТО 6646 СЕНТЯБРЯ В 5 ДЕНЬ



    Бѣ сей святый благовѣрный и великий князь Георгий Всеволодович[1] сын святому благовѣрному и великому князю Всеволоду, а во святом крещении наречен бысть Гавриил, псковский чудотворец.[2] Сей святый благовѣрный и великий князь Всеволод сын бѣ великому князю Мстиславу,[3] внук же святому и равно апостолом великому князю Владимиру Киевскому,[4] самодержьцу Российския земли. Святый же благовѣрный и великий князь Георгий Всеволодович — правнук же святому благовѣрному и великому князю Владимиру.



    Святый же благовѣрный княз Всеволод первие княжи в Великом Новѣ-градѣ. Егда же бысть время, возропташа новгородцы на нь и рѣша сами собою промежь себе, яко князь наш, не крещен сый, владѣет нами крещеными. Совѣт же сотвориша, и приидоша к нему, и изгнаша вон. Он же прииде в Киев к дяде своему Ярополку[5] и сказа ему все, за что изгнан бысть новогородцы. Он же, слышав от него, и въда ему Вышград. И ту молим бысть от псковичь княжити у них, и прииде к ним во град Псков. И по времени восприя благодать святаго крещения, и наречен бысть во святом крещении Гавриил. И пребысть в велком пощении и воздержании, и пребысть лѣто едино в вѣчный покой отиде, в лѣта 6671-го, месяца февраля в 11 день. И погребен бысть сыном его благовѣрным и великим князем Георгием. И быша чудеса многа от святых мощей его в славу и хвалу Христу Богу нашему и всѣм святым. Аминь.



    Сей святый благовѣрный князь Георгий Всеволодович по преставлении отца своего благовѣрного князя Всеволода, нареченного во святом крещении Гавриила, пребысть на мѣстѣ его по умолении псковичь. Бысть же сие в лѣта 6671. Изволи святый благовѣрный и великий князь Георгий Всеволодовичь ехать к благовѣрному князю Михаилу Черниговскому.[6] Егда же прииде к благовѣрному князю Михаилу и благовѣрный и великий князь Георгий, и поклонися благовѣрному князю Михаилу, и рече ему: «Здрав буди, благовѣрный и великий княже Михаиле, на многая лѣта, сияя благочестием и вѣрою Христовою, во всем уподобися прадѣдом нашим и прабабѣ нашей, благовѣрной великой княгинѣ, христолюбивой Олгѣ,[7] иже обрѣте себе избранного и честного: бисера Христа, и вѣру его святых пророк же и апостол, и святых отец, и благовѣрному христолюбивому царю и равноапостольному прадѣду нашему, царю Константину».[8] И рече ему благовѣрный князь Михаил: «Здрав же буди и ты, благовѣрный и великий княже Георгий Всеволодовичь, прииде ко мнѣ з благим совѣтом и независтным оком. Что бо приобрѣте от зависти дѣд наших Святополк, иже восхотѣ владѣти и уби братей своих благовѣрных и великих князей. Бориса повелѣ копием пробости, Глѣба же ножем заклати[9] в лѣта княжения их. Обольсти бо их лестию и советом сатаниным, яко мати при смерти есть наша.[10] Они же, яко незлобивые агньцы, уподобишася благому пастырю своему Христу, не сопротив сташа врагу своему брату. Господь же прослави святыя угодники своя, благовѣрных князей и великих чудотворец Бориса и Глѣба».



    И даша цѣлование промеж себѣ сами, и праздноваша духовно и веселивъшеся, и рече благовѣрный и великий князь Георгий благовѣрному князю Михаилу: «Даждь ми грамоту в Русии нашей по градом церкви Божия строити и грады». И рече ему благовѣрный и великий князь Михаил: «Якоже хощеши, тако и сотвори церкви Божия в славу и хвалу пресвятому имени Божию. За сие доброе твое изволение мзду приимеши в день пришествия Христова».



    И пироваше много дний. И егда изволи благовѣрный князь Георгий ехати во свое мѣсто, тогда благовѣрный князь Михаил повеле грамоту написати и свою руку приложи к грамотѣ. И егда благовѣрный князь Георгий поеха во свое отечество и град, тода благовѣрный князь Михаил с великою честию отпущяше его и провожаше. И егда бысть оба князи на пути, и поклонистася друг другу на пути, и вда ему благовѣрный князь Михаил грамоту. Благовѣрный же князь Георгий взя грамоту у благовѣрнаго князя Михаила, и поклонися ему, тогда и той противу ему.



    И поеха по градом, и егда приеха в Нов-град, повелѣ строити церьковь во имя Успения пресвятыя владычицы нашей Богородицы и приснодевы Марии в лѣто 6672. Из Нова-града поехав во Псков, град свой, идѣже преставися отец его, благовѣрный князь Всеволод, а во святом крещении Гавриил, новогородский и псковский чудотворец. И поеха изо Пскова града к Москве, и повелѣ строити церковь во имя Успения пресвятыя владычицы нашея Богородицы и приснодевы Марии в лѣто 6672. И поеха с Москвы в Переславль Залѣской, а с Переславля града в Ростов град. В то же время бысть в Ростовѣ градѣ великий князь Андрей Боголюбский.[11] И повелѣ благовѣрный князь Георгий во градѣ том Ростовѣ церковь строити во имя Успения пресвятыя владычицы нашея Богородицы и присно девы Марии в лѣто 6672, месяца маия, в 23 день. Во дни великого князя Георгия начаша рвы копати на основание церкви, обретоша же мощи лежаще святителя Христова Леонтия епископа ростовского, чюдотворца,[12] иже обрати в Ростовѣ градѣ люди в вѣру христову и крести их от мала и до велика. И возрадовашеся радостию великою благовѣрный князь Георгий и прослави Бога, давшаго ему таковое многоцѣнное сокровище, и отпѣ молебен. И повелѣ ехати Андрею, князю Боголюбскому, во град Муром и строити во градѣ Муромѣ церковь во имя Успения пресвятыя владычицы нашея Богородицы и присно девы Марии.



    Сам же благовѣрный и великий князь поеха из града Ростова, и приеха во град Ярославль, что на брегу Волги рѣки стоит. И сѣде в струг, и поеха на низ по Волгѣ, и приста к брегу в Малый Китежь, что на брегу Волги стоит, и построи его. И начаша его молити вси людие града того благовѣрнаго князя Георгия, чтобы образ чудотворный иконы пресвятыя Богородицы Феодоровския внес во град к ним. Он же по прошению исполни. Начат пѣти молебен пресвятѣй Богородицѣ. Егда сконча, восхотѣ образ той нести во град, образ же не пойде с мѣста того, нимало не поступи. Видѣв же благовѣрный князь Георгий изволение пресвятыя Богородицы, гдѣ сама изволила мѣсто себѣ, повелѣ построити на том мѣстѣ монастырь во имя пресвятыя Богородицы Феодоровския.



    Сам же благовѣрный князь Георгий поеха с мѣста того сухим путем, а не по водѣ. И перееха рѣку Узолу, и вторую рѣку перееха именем Санду, и третию рѣку перееха именем Саногту, и четвертую перееха именем Керженец, и приеха к езеру именем Свѣтлояру. И видѣ мѣсто то велми прекрасно и многолюдно. И по умолению их повелѣ благовѣрный князь Георгий Всеволодович строити на брегу езера того Свѣтлояра град именем Болший Китеж, бѣ бо мѣсто то велми прекрасно, и на другом же брезѣ езера того роща дубовая.



    Совѣтом же и велѣнием благовѣрного и великаго князя Георгия Всеволодовича начаша рвы копати на утверждение мѣста. И начаша класти церковь во имя Воздвижения честнаго креста Господня, вторую же церковь — во имя Успения пресвятыя владычицы нашея Богородицы и присно девы Марии и третию церковь — во имя Благовещения пресвятыя владычицы нашея Богородицы и присно девы Марии. В тѣх же церквах повелѣ предѣлы дѣлати иных праздником Господьскым и Богородичным. Тако же и образы всѣм святым написати повелѣ.



    И град той Больший Китежь на сто сажен в длину и в ширину, и бысть первая мера мало мѣсто. Повелѣ же благовѣрный князь Георгий еще на другое сто сажен прибавити в длину, и бысть мѣра граду тому в длину — два ста сажен, а в ширину — на сто сажен. И начаша же град той каменный строити в лѣто 6673, месяца маия в 1 день, на память святаго пророка Иеремия и иже с ним. И строитца град той три лѣта, и построиша его в лѣто 6676, месяца сентября в 30 день, на память святаго священномученика Григория Великия Армении.



    И иже поехаша в Малый Китежь, что на брегу Волги стоит, благовѣрный князь Георгий Всеволодович. И по строении градов тѣх, Малаго и Большаго, повелѣ перемеряти поприща,[13] коль много межь собою расстояния имѣют. И повелѣнием благовѣрнаго князя Георгия намѣряша сто поприщь. Благовѣрный же князь Георгий Всеволодовичь, слышав сия, воздаде славу Богу и пресвятѣй Богородице, повелѣ же и лѣтописец книгу написати. Сам же благовѣрный и великий князь Георгий Всеволодовичь повелѣ всю службу отслужити. И молебен пропѣв пресвятѣй Богородицѣ Феодоровской, и по совершении службы тоя поеха, всѣд в струг свой, и отплы в путь свой в прежде реченный свой Псков град. Людие проводиша его с великою честию, и цѣловаша его, отпустиша.



    Благовѣрный же князь Георгий Всеволодовичь егда приеха во град свой, прежереченный Псков, и многи дни пребысть в молитвѣ, в постѣ же и бо бдѣнии, и много милостыни раздая нищим, и вдовицам, и сиротам. По построении же градов тех поживе лѣт 75.



    Быст в лѣто 6747. Попущением Божиим грѣх ради наших прииде на Русь воевати нечестивый и безбожный царь Батый. И разоряше грады и огнем пожигаше, церкви Божия такоже разоряше и огнем пожигаше же. Людей же мечю предаваше, а младых дѣтей ножем закалаше, младых дѣв блудом оскверняше. И бысть плач велий.



    Благовѣрный же князь Георгий Всеволодовичь, сия слышав, плакаше горко. И помолився ко Господу и пресвятѣй Божией Матери, собра вои своя, поиде противу нечестиваго царя Батыя с вои своими. И егда сразишася вои обои вкупе, бысть сѣча велия и кровопролитие.



    Тогда у благовѣрнаго князя Георгия и бысть мало вой, побѣже благовѣрный князь Георгий от нечестиваго царя Батыя вниз по Волге в Малый Китеж. И много брася благовѣрный князь Георгий с нечестивым царем Батыем, не пущая его во град свой.



    Егда же бысть нощь, тогда благовѣрный князь Георгий изыде тайно из града того въ Больший град Китеж. На утрие же воста той нечестивый царь на град той с вои своими, приступом приступи и взя его. И всѣх поби и прируби людей во градѣ том. И не обрѣте благовѣрнаго князя во градѣ том, нача мучити человека, и немогий мук терпѣти повѣда ему путь. Той же нечестивый гнаше вслѣд его. И егда прииде ко граду тому, нападе на град той со множеством своих, и взя той град Больший Китеж, что на брегу езера Свѣтлояра, и уби благовѣрнаго князя Герогия месяца февраля в 4 день. И поеха из града того нечестивый той царь Батый. И послѣ его взяша мощи благовѣрнаго князя Георгия Всеволодовича.



    И послѣ разорения того запустѣша грады тѣ, Малый Китежь, что на брегу Волги стоит, Больший же, что на брегу езера Свѣтлояра.



    И не видим будет Болший Китежь даже и до пришествия Христова, яко же и в прежняя времена бысть сия, яко же свидѣтельствуют жития святых отец, патерик Монасийский, и патерик Скитский, и патерик Азбучный, и патерик Иеросалимский, и патерик Святыя Горы,[14] яко сия святые книги согласны, в них писаны жития святых отец, и сокровенныя обители не едина, но много монастырей, и въ тѣх монастырех много множество бысть святых отец, яко звѣзд небесных просияв житием своим. Яко пѣска морскаго невозможно исчести, тако и сих невозможно писанию предати и вся списати. О них же, провидя Духом Святым, блаженный и пророк Давыд царь, удивляясь, вопиет Духом Святым, в богодухновенной книгѣ своей Псалтыри глаголет: «Праведник яко финик процвѣтет и яко кедр иже в Ливанѣ умножится, насаждени в дому Господни во дворѣх Бога нашего процвѣтут».[15] И еще той же пророк царь Давыд: «Мнѣ же зѣло честнии быша друзи твои, Боже, зѣло утвердишася владычествия их, изочту их, и паче песка умножатся».[16] О сих, провидя Духом Святым, блаженный апостол Павел в послании книги своея глаголет, провидя, сие слово к нам глаголет: «Проидохом во овчинах и козиях кожах, лишени, скорбящеи, озлоблени, имже не бѣ достоин мир».[17] То же слово и святый Иоанн Златоуст рече, в поучении своем глаголет в неделю 3-ю поста. То же слово, провидя, к нам святый Анастасий горы Синайския[18] глаголет. Сие же слово апостольское, провидя, нам глаголет и преподобный отец наш Иларион Великий,[19] о святых пишет: «И такоже убо в послѣднее время будет сие: грады и монастыри сокровеныя будут, якоже антихрист царствовати начнет в мирѣ. Тогда побѣгут в горы и в вертепы, и в пропасти земныя». Человеколюбивый же Бог не оставит тогда хотящаго спастися. От усердия, и умиления, и слез все человеку Бог строит. Самого Спасителя Божественная уста глаголаше в пресвятом Евангелии, рече, яко вся ищущему и хотящему спастися дастъся.[20]



    И по убиению святаго и благовѣрнаго и великаго князя Георгия Всеволодовича и по погребению честных мощей его, в лѣто 6-е прииде той царь Батый воевати в русское царство. Пойде же противу Батыя царя благовѣрный князь Михаил Черниговский з боярином своим Феодором. И егда сразишася вои обои вкупѣ, и бысть кровопролитие велие. И уби той нечестивый царь Батый благовѣрнаго и великаго князя Михаила Черниговскаго з болярином Феодором в лѣто 6750, месяца сентября в 20 день. И послѣ убиения благовѣрнаго князя Михаила Черниговскаго во 2-е лѣто[21] уби благовѣрнаго князя Меркурия Смоленскаго[22] той нечестивый царь Батый в лѣта 6755, месяца ноября в 24 день. И бысть запустѣние московскаго царства и прочих монастырей и того града Большаго Китежа в лѣто 6756.

    << Previous Day 2013/04/26
    [Calendar]
    Next Day >>

About LJ.Rossia.org