1:54PM - Пресвятая Богородице, спаси нас!
Днесь пророчество святителя Петра/ пред очами нашими сбывается,/ сердце бо России град Москва/ свыше славу велию приемлет,/ украшаем, яко бисером честным,/ многим сонмом Божиих угодников;/ к нимже мы любовию возопиим:/ о, пречуднии святителие,/ исповедницы и мученицы новии,/ благовернии князие, преподобнии отцы,/ и премудрии юродивии,/ и вси святии, знаемии и незнаемии,/ яко благочестия столпи,/ молите Христа Бога/ стране нашей в мире спастися.
Заступнице верных Преблагая и Скорая,/ Пречистая Богородице Дево!/ Молим Тя пред святым и чудотворным образом Твоим,/ да, якоже древле от него заступление Твое/ граду Москве даровала еси,/ тако и ныне нас от всяких бед и напастей милостивно избави// и спаси души наша, яко Милосердая.
Взбранной Воеводе победительная,/ яко избавльшеся от злых,/ благодарственная восписуем Ти, раби Твои, Богородице,/ но, яко имущая державу непобедимую,/ от всяких нас бед свободи, да зовем Ти:// радуйся, Невесто Неневестная.
