Van den regulier moninck
Песенка из антверпенского сборника (1544).

Van den regulier moninck

Hier beghinnen wi nu an
Een nyeuwe liet te singhen
Ende singhen van eenen regulier moninck
Ende van eender nayerinne

Die regulier in een waerts huys quam
Hi vraechde wat hebdy te eten
Ick soude tot eender nayerssen gaen
Het was mi bi na vergeten

Doen hi totter nayerssen quam
Hi wert seer wel ontfanghen
Si nam hem in haren witten arm
Ende si aten met malcander

Doen twas aender middernacht
Si hoorden dat clocxken clincken
Staet op staet op goet regulier moninck
Die metten moet ghi singhen

Doen dat clocxken gheluyt was
Hi soude gaen inder metten
Och wiste dit mijn heere den abt
Hi soude mi selver wecken

Doen die moninck in den ommeganck quam
Die abt die quam teghen
Bona dies bona dies ghi regulier moninc
Waer hebdy te nacht gheleghen

Daer ick te nacht gheleghen hebbe
Daer was ic seer wel ontfanghen
Men schencte mi daer den coelen wijn
Ic lach in mijn liefs armen

Die abt al tot den moninck sprack
Met also soeten woorden
Nu segt mi regulier moninck
Houden dat onse oorden

Doen die moninck inder kercken quam
Die broederen liepen te samen
Die een moninc al tot den anderen sprack
Desen moninck willen wi verbannen

En dat verhoorde de regulier moninck
Hi liet zijn capken vallen
Spude mi die naeyersse niet liever zijn
Mer dan mijn broeders allen

Die ons dit liedeken heeft ghemaect
Ho hevet seer wel ghesonghen
Dat heeft ghedaen een regulier moninck
Uyt der capen is hi ontspronghen