О чем заметка? Москваын улэ Гондыр
Улонлэн бугорез олокытчы но вуттэ. Тани алигес шуд усиз Москвае вуылыны. Огшоры учкись кадь мынћ, удмурт пиарчи луи - Москваез удмурт калыкен тодматћ. Отын улћсьёслэн удмуртъёс сярысь тодонзы лябгес. Калашников шуиськод ке, пальпото ик. Пермь но Казань вискын улћськом шуыса валэктоно луэ. Москваын улћсь эшъёсы монэ паськыт бурд улазы кутћзы, метро но шаурма зыно шоркарлэсь шузимыны ќз сётэ. Эшъёсы пќлысь одћгез - Виктория Ломаско, егит художник, уно сайтъёслы комиксъёс суреда. Антон Николаев - «актуальной искусстволэн шаян нылпиез», художник, «Бомбилы» группалэн шорсюлмыз.
Туспуктэмъёсъя но мультмедияя Родченко нимо школаын Антонэз лекция лыдњыны косћллям. Мон сьќраз куриськи. Видео-артсэ возьматон куспын Бомбила шуак вераз:
- Бомбилаос тужгес но бадњым саклык висъяло провинциын кино дасянлы, соин ик туннэ дорамы куноын - удмурт переводчик!
Ма карод, камера но калык азьын вераськоно луиз.
Џуказеяз Викториялэн но Антонлэн нимаз адњытонзы ортчиз. Радъяны юрттћз «Браун страйп» галереялэн кузёез, Родченко нимо школаысь дышетћсь Пётр Жуков. Тумошо, но зэм: галерея интыяськемын Жуковлэн квартираяз, буш висъетаз. Ойдолэ, егитъёс, Ижкарын но сыџе амалъя ужаломы!
Адњытонзылэн нимыз - «Ефремов». Кылем арын Виктория Ломаско, «бомбилаос», озьы ик Москваысь, ма, быдэс Россиысь тодмо суредась Владимир Дубосарский вуылћзы Тула улосэ, пичи гинэ Ефремов городэ. Татысь улон соослы туж тунсыко потћз. Комиксъёслы тупась учыръёс но трос, со сяна, калык пќлын улэпесь ай визькылъёс но мифъёс.
Тунсыко: та пичи городын соос соку плов но сиыны ќз дћсьтэ, нош мынам пыжем перепече, однако, дефицит шуон луиз! Мискинь москваос акыльтћллям ни, лэся, гамбургер но сэндвич сиёнъёслэсь. Тодмотэм учкисьёс-куноос, ческыт зынэз шќдыса, кухняе пыразы но, таджик гастарбайтер шоры кадь, шорам долкаллязы. Кема ќз кыстћськы та абдран: Москваын улћсь фин-угор эшъёсы люкаськизы но, удмурт кырњанъёсты нуйтћм ук! Татысь дипломатияя академиын дышетскисен Ольга Урасиноваен ми Ижын но џош кырњамы вал.
Алёша Шкляев, веб-дизайнер но пќртэм ужрадъёсъя удмурт менеджер, «Археоптерикс» группалэсь дасям видеозэ љуатћз. Ваньзы сое тунсыко потыса учкизы. Кызьы уз! Кызьы сюлэм уз вырњы: водь калык куинь сю мурт кылемын ни, нош Москваысь суредасьёс-буржуйёс пырултэм ужъёссэс миллионъёсын вузало. Мед соос но синзэс берыктозы ай ми пала. Сыџе тћни удмурт пиар!
Тумошо пќрмиз: Москваын дышетскись пияш Антон Николаев кутћз Гондыр ним. Озьы тћни Москва каллен удмуртоме. Удмуртъёс но табере мед москваяськозы! Соку капчигес луоз перепеч но пыжыны, суредъёс-мифъёс но кылдытъяны. Џош!
Дарали Лели
http://www.udmdunne.ru/articles/art2786.html?PHPSESSID=059aeaf7fee25b2f496a70d760b62e54